ମୁମ୍ବାଇ/ନୂଆଦିଲ୍ଲୀ: ଆଇପିଏଲ୍ ୨୦୨୭ ସିଜିନ୍ ପୂର୍ବରୁ କ୍ରିକେଟ୍ ଜଗତରେ ଏକ ବଡ଼ ଧରଣର ଅଦଳବଦଳ ଦେଖିବାକୁ ମିଳିଛି। ପାଞ୍ଚ ଥରର ଚାମ୍ପିଅନ୍ ମୁମ୍ବାଇ ଇଣ୍ଡିଆନ୍ସ ନିଜର ଅଧିନାୟକ ତଥା ଷ୍ଟାର୍ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ପଞ୍ଜାବ କିଙ୍ଗ୍ସ ସହ ଟ୍ରେଡ୍ କରିଛି। ଏହାର ବଦଳରେ ଭାରତର ପ୍ରମୁଖ ବାମହାତୀ ଦ୍ରୁତ ବୋଲର ଅର୍ଶଦୀପ ସିଂହ ପଞ୍ଜାବ କିଙ୍ଗ୍ସ ଛାଡ଼ି ମୁମ୍ବାଇ ଇଣ୍ଡିଆନ୍ସରେ ଯୋଗ ଦେଇଛନ୍ତି।
ଆଇପିଏଲ୍ ପକ୍ଷରୁ ଜାରି କରାଯାଇଥିବା ଆନୁଷ୍ଠାନିକ ସୂଚନା ଅନୁଯାୟୀ, ହାର୍ଦ୍ଦିକ ପାଣ୍ଡ୍ୟା ୧୮ କୋଟି ଟଙ୍କା ମୂଲ୍ୟରେ ପଞ୍ଜାବ କିଙ୍ଗ୍ସରେ ସାମିଲ ହୋଇଛନ୍ତି (ପୂର୍ବରୁ ତାଙ୍କର ମୂଲ୍ୟ ୧୬.୩୫ କୋଟି ଟଙ୍କା ଥିଲା)। ଅନ୍ୟପକ୍ଷରେ ଅର୍ଶଦୀପ ସିଂହ ମଧ୍ୟ ତାଙ୍କର ପୂର୍ବ ନିର୍ଦ୍ଧାରିତ ୧୮ କୋଟି ଟଙ୍କା ମୂଲ୍ୟରେ ମୁମ୍ବାଇ ଇଣ୍ଡିଆନ୍ସକୁ ଆସିଛନ୍ତି। ଏହି ବଡ଼ ଚୁକ୍ତି ସହ ମୁମ୍ବାଇ ଇଣ୍ଡିଆନ୍ସରେ ହାର୍ଦ୍ଦିକଙ୍କ ଦ୍ୱିତୀୟ ପର୍ଯ୍ୟାୟ ଯାତ୍ରାର ଅନ୍ତ ଘଟିଛି। ୨୦୨୪ ସିଜିନ୍ ପୂର୍ବରୁ ସେ ଗୁଜରାଟ ଟାଇଟାନ୍ସ ଛାଡ଼ି ମୁମ୍ବାଇକୁ ଫେରିଥିଲେ ଏବଂ ରୋହିତ ଶର୍ମାଙ୍କ ସ୍ଥାନରେ ଅଧିନାୟକ ଭାର ସମ୍ଭାଳିଥିଲେ। ହାର୍ଦ୍ଦିକ ଏପର୍ଯ୍ୟନ୍ତ ୧୬୨ଟି ଆଇପିଏଲ୍ ମ୍ୟାଚ୍ ଖେଳି ୨,୯୫୫ ରନ୍ କରିବା ସହ ୮୨ଟି ୱିକେଟ୍ ନେଇଛନ୍ତି।
ଅନ୍ୟପଟେ, ୨୦୧୯ ରୁ ପଞ୍ଜାବ କିଙ୍ଗ୍ସ ପକ୍ଷରୁ ଖେଳୁଥିବା ଅର୍ଶଦୀପ ସିଂହ ୯୬ଟି ମ୍ୟାଚ୍ରୁ ୧୧୧ଟି ୱିକେଟ୍ ନେଇ ପଞ୍ଜାବର ସର୍ବାଧିକ ୱିକେଟ୍ ହାସଲକାରୀ ବୋଲର ରହିଥିଲେ। ଅର୍ଶଦୀପ ମୁମ୍ବାଇ ଦଳରେ ସାମିଲ ହେବା ଫଳରେ ଯଶପ୍ରୀତ ବୁମ୍ରାଙ୍କ ସହ ମିଶି ମୁମ୍ବାଇର ବୋଲିଂ ଲାଇନ୍-ଅପ୍ ଆହୁରି ଶକ୍ତିଶାଳୀ ହେବ। ସେହିପରି ହାର୍ଦ୍ଦିକଙ୍କ ଅଭିଜ୍ଞତା ଓ ନେତୃତ୍ୱ ପଞ୍ଜାବ କିଙ୍ଗ୍ସକୁ ପ୍ରଥମ ଆଇପିଏଲ୍ ଟ୍ରଫି ଜିତାଇବାରେ ସହାୟକ ହେବ ବୋଲି ପଞ୍ଜାବ କିଙ୍ଗ୍ସର ସିଇଓ ସତୀଶ ମେନନ୍ ଆଶା ବ୍ୟକ୍ତ କରିଛନ୍ତି।


Leave a Reply